L'USI ed il rinforzament da l'identitad pluriculturala da la Svizra

Per rinforzar l'identitad pluriculturala svizra beneventa l'Università della Svizzera italiana (USI) dals 9 fin ils 27 da fanadur 31 giuvenils tranter 15 e 20 onns. Els derivan dals chantuns da Berna, Friburg, Genevra, Giura, Grischun, Soloturn, Turitg, Vad e Vallais ed han la chaschun d'emprender d'enconuscher meglier la lingua e cultura da la Svizra taliana. Malgrà che questa idea è naschida gia avant, resguarda ella bain ils intents dal forum a favur dal talian che la Regenza tessinaisa ha proponì la mesemna passada. L'USI vegn a participar cun plaschair a quest forum.

Tenor Susanne Stigen Pescia, la manadra dals curs da talian che l'USI porscha dapi onns a students e professurs che na discurran betg talian, duain quests emprims segiurns linguistics per gimnasiasts da l'autra vart da las Alps dar la pussaivladad da "sa scuntrar, emprender d'enconuscher e reunir las differenzas". La damaun vegnan purschidas al Campus di Lugano lecziuns davart la lingua e la cultura ed il suentermezdi han lieu excursiuns e lavuratoris. Las activitads extrascolasticas èn vegnidas planisadas ensemen cun il servetsch da sport USI-SUPSI ed il Departament per giuvenils ed events da Lugano.

L'iniziativa è naschida da la collavuraziun gia consolidada tranter l'USI e l'Associaziun svizra dals professers da talian (ASPI), pli precis da l'idea da Nicole Bandion, coordinatura dal project per l'USI e da prof. Sonia Ehnimb-Bertini, docenta a la scola chantunala Limmattal ad Urdorf (Turitg). Il project ha pudì vegnir realisà grazia a l'engaschi da 50 ulteriurs professers da talian che instrueschan en gimnasis da la Svizra romanda e tudestga e grazia a las famiglias tessinaisas (chattadas cun l'agid dals gimnasis da Lugano) che dattan albiert als giuvenils.

L'USI ed il rinforzament da l'identitad pluriculturala da la Svizra

Cun ils segiurns linguistics s'engascha l'USI per la protecziun dal pluralissem cultural naziunal e per la promoziun dal talian en Svizra. Quest engaschi ha il president da l'USI, Piero Marinoli, definì sco "obligaziun morala per mantegnair il plaschair da l'unitad en la diversitad – quai ch'è caracteristic per la Svizra".

L'USI, la suletta universitad da lingua taliana en Svizra, ha fundà il 2007 l'Institut da studis talians (ISI)che promova retschertgas e numerusas activitads culturalas concernent la lingua, la litteratura e la cultura taliana e ch'è responsabel per trais direcziuns da studi en italianistica e humanitates: in master, in doctorat ed il nov bachelor en lingua, litteratura e cultura taliana che cumenza il settember.

En pli beneventa l'universitad mintg'onn numerusas persunas da lingua estra. A quellas porscha ella in impurtant program da curs da talian. Il 2011 ha la Cumissiun europeica decidì da sustegnair l'USI sco partenaria per la promoziun dal talian e finanziescha perquai ils curs intensivs da talian (Erasmus Intensive Language Courses EILC) che pon far ils students che fan part dal program da barat Erasmus.

Ils giuvenils che sa participeschan al segiurn raquintan da lur experientschas a las 10.00 en l'aula 321 dal Campus di Lugano e durant ina da las activitads dal suentermezdi (vesair il program en l'agiunta). Questa communicaziun è disponibla en tut las quatter linguas naziunalas.

Fotografías: http://www.foto.usi.ch/plogger/index.php?level=album&id=73
L'Institut da studis talians (ISI) https://www.isi.usi.ch/

Questa communicaziun è disponibla en tut las quatter linguas naziunalas.

Tudestg: https://www.usi.ch/it/feeds/21687
Talian: https://www.usi.ch/it/feeds/21686
Franzos: https://www.usi.ch/it/feeds/22627